Unaweza ukalala wakati
wowote hasa usiku, ukajiona uko na ndugu wengi mmeizunguka meza, mnakula na
kufurahiana sana. Wakati mwingine mnabishana, mnafokeana na kukasirikiana na
kuchongeana kwa wazazi au wakubwa wenu wa familia. Wakati mwingine unaota uko
na mafanikio makubwa katika viwango vyetu kama watanzania, ambao mafanikio
tunahesabu ni kuwa na kipato cha kukuwezesha kuishi kila siku na kuweka akiba
kidogo. Nyumba nzuri, shamba na usafiri wako binafsi.
Lakini unaamka asubuhi
unajikuta kumbe huna kitu! Ilikuwa ni ndoto tu. Bilionea mmoja Billy Gates
aliwaeleza waandishi wa habari kwamba akifa mali zake zote zitumike katika
kufanya utafiti wa magonjwa yaliyoshindikana ukiwapo ukimwi, aliwaeleza
waandishi kwamba maisha ni kama mchezo ambao kila mtu anatakiwa aucheze kwa
kadri anavyoweza. Alisema kwa utajiri alionao watoto wake na vizazi vyao
wanaweza kula bila kufanya kazi kwa miaka mingi sana, kwa hiyo hawataweza
kufaidi mchezo wa maisha ambao wakati mwingine ni kama kuchanga karata au
kutupa kete.
Kuna wakati katika maisha ya kawaida unapita kwenye kipindi chenye
uchungu sana kiasi unajisemea moyoni kwamba unaweza kujuta kuzaliwa. Lakini kwa
neema ya Mungu unapita na kusahau inabaki kuwa kama historia tu.
Na hasa kwa kufikiria
kwamba jambo likishatokea haliwezi kurudi, inabidi ufute machozi na kuangalia
nini kinachoendelea mbele. Wakati napoteza mama yangu mzazi nilikuwa bado mdogo
sana nina umri wa miaka kama mitano hivi. Katika umri huu mtoto ndio anakuwa
anamuona mama yake ndio kila kitu katika dunia hii. Na chochote anachotaka mama
atampatia tu. Kuanzia ulinzi kutoka kwa ndugu wakubwa wanaomchokoza au watoto
wa majirani n.k.
Ilikuwa ni kawaida ukichelewa kurudi nyumbani ni lazima
utafutwe na ukipatikana ni lazima uchapwe. Lakini ikatokea ghafla hakuna mtu wa
namna hiyo unaporudi nyumbani umechelewa moyo unadunda kwa hofu ya kuadhibiwa.
Unakwenda jikoni kuchungulia kwa tahadhari labda utamuona mama lakini hukuti
mtu, unajaribu kuingia sebuleni kwa kunyatia pia huoni mtu. Harafu unakumbuka
siku ile walipokuwa wanaufukia mwili wake kwenye shimo. Unajisikia kwenye moyo
ni kama kuna mtu anauchanja moyo wako na kiwembe.
Unakaa chini kwa muda,
ukiangalia ulivyochafuka kwa vumbi la mpira uliokuwa unacheza limekujaa
mwilini. Na baridi la kwetu mwezi wa sita na wa saba ni kali balaa! bila kuoga
maji ya moto ni adhabu kubwa sana. Lakini sasa hakuna jinsi, mtu aliyekuwa anakujali
kwa kukuchemshia maji ya kuoga hayupo tena duniani. Una namna mbili ya kufanya kuamua
ama ulale bila kuoga au uoge maji baridi, na baridi yake ni kama barafu
iliyoyeyuka. Wakati unatafakari haya ukiwa pembeni ya jiko la mkaa ili upate
joto. Ndio mtu mwingine hasa dada anakumbusha umuhimu wa usafi wa mwili kwa
afya.
Unajaribu kumwangalia kwa jicho la hasira, lakini haisaidii.
Unalazimishwa kwenda kuoga maji ya baridi bila huruma. Mtetezi wako ambaye angalau
ulikuwa ukilia anaumia moyo sasa hayupo tena. Hayo ndio yanakuwa ndio maisha
yako ya kila siku kujipigania mwenyewe. Hata kama baba yupo lakini huwezi
kujieleza vizuri mbele yake. Na yeye hana ujuzi wa kujua sana tabia za watoto,
kwa hiyo wanachosema kaka na dada zako ndicho anachoamini.
Hapo inabidi
mwenyewe ujiongeze na kukubaliana na hali ili mradi maisha yaendelee. Wakati
mwingine unajikuta wakubwa wako wametawanyika hawapo nyumbani wamekwenda sehemu
mbalimbali za nchi kutafuta maisha. Na wewe ndio unajikuta umekuwa mkubwa hapo.
Baba yuko mbali mnaonana mara moja kwa juma. Hapo inabidi wewe ndio uwe baba na
mama kwa kuwalea wadogo na wajomba zako. Unachojua kupika ni chai tu, labda na kuchemsha maharage
ambayo umekatia nyanya na kitunguu na kumiminia mafuta juu kwa juu bila
kukaanga. Lakini muda umefika wadogo na wajomba zako wanatakiwa kula. Unajaribu
kupika ugali lakini kabla maji hayachemka unatia unga, matokeo yake ugali unatota
haujaiva haufai kuliwa! Unachungulia nje kuona kama kuna mtu anakuangalia kisha
unachimba shimo na kubeba sufuria ya ugali na kuumwaga.
Kisha unaanza kupika
tena mwingine kwa sababu hakuna mtu wa kukufundisha unakuwa unatumia zaidi
makosa kwa kujifunza. Hapo hakuna jinsi, wadogo zako wanatakiwa wale, hatimaye
unajitahidi ugali unaiva lakini una maruturutu ya unga kibao! lakini kwa sababu
wote mna njaa mnabaki kula huku mkiusifia kwamba hakuna ugali mtamu kama huu!
Na kwa sababu kati yetu wote ni wavulana kazi zote tunapangiana wenyewe na
nyingine zinaamuliwa kwa kupigana ngumi,
na watu wakianza kupigana
mnawatengenezea uwanja, hakuna kuamulia anayepigwa ndio anayekwenda kufanya
hiyo kazi. Ukifanya kosa lolote ni push up au kichurachura na adhabu zingine za
kujenga mwili. Baada ya muda hakuna mtu mnyonge pale nyumbani! watu wote ni
wababe ukianzisha ugomvi unaweza usiishe na kila silaha inatumika kuanzia mawe,
meno n.k. Na ile sheria ya asiyefanya kazi asile kwetu ilikuwa inatekelezwa
sawasawa. Unaweza kupewa ugali lakini mboga ukatafute mwenyewe kama utakula na
chumvi au limao ni wewe tu. Wakati mwingine ninapokutana na marafiki zangu wa
zamani. Tukikumbushana hayo huwa tunacheka mpaka machozi yanatoka. Lakini namshukuru
sana Mungu kwa kunipa maisha ambayo yamenifanya kuwa jasiri na kuwaheshimu
watu. Wakati naanza kujitegemea ili niweze kutoa mchango katika familia
nilikuwa katikati ya ndugu wengi.
Kiasi cha kwamba nilijiona sina majukumu
makubwa katika familia. Lakini baadae akaanza kupotea mmoja baada ya mwingine
mpaka unahisi au niko ndotoni? Mpaka unaogopa lakini ninajipa moyo kwa kuwa
nimeokoka na kwa kweli siogopi kifo kwa sababu najua maisha ni kama zawadi tu
kutoka kwa Mungu na ni lazima niishi katika kusudi lake. Mungu wetu ni
mwaminifu sana na anazijua sana huzuni zetu. Lakini pia anajua namna ya
kutufariji.
Maneno haya yawe faraja kwa
wote waliopoteza wapenzi wao kwa nyakati mbalimbali.
Hakuna maoni:
Chapisha Maoni