MAPAMBANO KATIKA ULIMWENGU WA ROHO SEHEMU YA KWANZA

MAPAMBANO KATIKA ULIMWENGU WA ROHO

SEHEMU YA KWANZA

 

Biblia inasema.

10 Hatimaye, mzidi kuwa hodari katika Bwana na katika uweza wa nguvu zake.

11 Vaeni silaha zote za Mungu,mpate kuweza kuzipinga hila za shetani

12 kwa maana kushindana kwetu sisi si juu ya damu na nyama; bali ni juu ya falme na mamlaka,juu ya wakuu wa giza hili, juu ya majeshi ya pepo wabaya katika ulimwengu wa roho.

13 kwa sababu hiyo twaeni silaha zote za Mungu,mpate kuweza kushindana siku ya uovu,na mkiisha kuyatimia yote kusimama.

14 Basi simameni hali mmejifunga kweli viunoni, na kuvaa darii ya haki kifuani,

15 nakufungiwa miguu utayari wa injili ya amani.

16 Zaidi ya yote mkitwaa ngao ya imani ambayo kwa hiyo mtaweza kuizima mishale yote yenye moto ya Yule mwovu

17 tena ipokeeni chepeo ya wokovu, na upanga wa r oho ambao ni neno la Mungu

18 kwa sala zote na maombi mkisali kila wakati katika roho.  

ili tuweze kulewa vizuri na kwa urahisi somo hili ni muhimu kuanza na mistari hii ya Biblia ili kujenga msingi wa somo hili.

Tunasoma hapa mtume Paulo anawaelezea Waefeso mistari michache lakini muhimu sana juu ya aina ya vita tunayopigana, na namna ambavyo tunatakiwa kupigana.

Kwa kawaida vita huwa inapiganwa kwa mbinu na mipango, maana kama umewahi kusikia watu wakisema kwamba vita si lelemama kwa hiyo ili tuweze kushinda vita ya aina yeyote ile tunahitaji kujifunza mbinu za kivita.

Maisha ya wokovu sio maisha mepesi kama tunavyoaminishwa na baadhi ya wainjilisti kwamba kwa Yesu ni tambarare, hakuna milima wala mabonde!. Hiyo sio kweli, ukishaambiwa kuna vita na unatakiwa kupigana basi ni lazima ujue kwamba wewe sio raia tena bali ni askari.

Na kwa kawaida askari ni raia aliyepewa mafunzo maalumu ya kupigana vita, kwa kutumia zana mbalimbali za kivita. Ndio maana inakuwa muhimu sana kujifunza aina ya vita na mbinu ambazo zitatusaidia kupata ushindi.

katika mstari wa 12 Mtume Paulo analiambia kanisa;-

” 12 kwa maana kushindana kwetu sisi si juu ya damu na nyama; bali ni juu ya falme na mamlaka, juu ya wakuu wa giza hili, juu ya majeshi ya pepo wabaya katika ulimwengu wa roho.”

Katika mstari huu Biblia inatujulisha wazi kuhusu aina ya vita tunayopigana, tunapigana na nani, lakini pia ni katika mstari huu anatufahamisha kuhusu aina mbili za ulimwengu, kwamba kumbe kuna ulimwengu wa damu na nyama ambao ndio dunia hii ambayo sisi tunayoishi, Lakini pia kuna ulimwengu wa roho ambao sisi kwa macho na kwa akili za kawaida hatuwezi kuuona wala viumbe vinavyokaa katika ulimwengu huo hatuwezi kuviona katika macho ya kawaida.

Ulimwengu huo ndio ambao nataka tuuangalie kwa undani zaidi kwani katika sehemu ya pili ya somo hili, kwani inawezekana tukawa tunajua mambo machache sana kuhusu ulimwengu huo wa roho.

SOMO LITAENDELEA

Tunaweza kuwasiliana

Furaha Amon Mob: 0713 461593